TURA: Tourism-o Garo Hills-ni mingsing minggamgipa biaprang aro rona rotogipa biaprangni gimin gipin biaprangoni manderang knasotokkujaengani a·selsa Garo Hills-ona tourist-rangni re·baani namen komienga ine Budbar salo, Tourism Ministry, North East-ni Regional Director Anil Oraw parakataha.
Budbar salo, Hospitality Stakeholder-rangni tom·aniko Tura-ni Circuit House-o ong·atanio Oraw, ia kattarangko parakataha.
Regional Director-ni parakatani gitade, ua Meghalaya a·dokko man·chape salgro salaram a·dokrango donggipa bang·bata biaprangonan re·angaha indiba Garo Hills-o mingsinggipa biaprangni giminde ua an·tangba knasoa dongbrekujachim.
Ian uni skanggipa changna Tura-ona re·baani ong·enga ine janapatengon, Garo Hills-ona re·baenggipa tourist-rang maidakgipa neng·nikanirangko chagrongna nangronga ine Oraw sing·sandie ra·angenba, Garo Hills-o tourism-ko tang·doatani cholrangko agan-ku·pattie on·angaha.
Garo Hills-o rona rotogipa aro nina nitogipa biaprang bang·en donga ine janapatengon, tourist-rangko salbana gita ia biaprangni bidingo bang·en advertisement-rangko on·na nangenga ine Oram parakatenba, iani bidingo ua pilak nanga dakchakanirangko on·na kusi ong·aigen ine ku·rachakaniko on·angaha.
Iana skang, West Garo Hills a·jani Additional Deputy Commissioner AVD Shira-ba, tom·anio bak ra·enggiparangna aganprakengon, skangrangode Tourism-o nangchakegipa dingtang dingtang scheme aro program-rangko ong·atrongachim indiba da·ororode iandakgipa program-rang dongjaengaha ine janapatenba, da·o Tourism Ministry North East-ni Regional Director-ba dongani gimin mikkangchide uni dakchakanichi aro dilanichi Tourism-ni kamrangko namdapatna man·gnok ine an·tangni ka·dongchakenganiko parakangaha.
Ia tom·aniko ong·atanio Tourism-ni Assistant Director Bulbuly S Marak, West Garo Hills-ni District Tourism Officer Ava Shereen Sangma, North Garo Hills-ni District Tourism Officer Trida B Sangma, Art & Culture department-ni District Research Officer Noringchi Momin aro gipinrangba bakko ra·angaha.
