SHILLONG: Meghalaya a·dokona gipin a·dokrangoniko na·tok ra·bae palaniko champengatani ja·man, badia a·dokoniko formalin sam su·gipa na·tokrangko a·dokona ra·baengachim, uko sorkari sandie man·aha ine Sombar salo, East Khasi Hills District Administration parakataha.
Indake ong·genchimoba, badia a·dokoniko formalin donggipa na·tokrangko a·dokona ra·baengachim, ukode East Khasi Hills a·jani Deputy Commissioner Rosetta Mary Kurbah, jinmana parakna gita jechakskaaha.
A·dokona ra·baenggipa na·tokrangko palna on·na skangba porikka ra·e nichenggen ine talataniko on·angengon, iani bidingo nangchongmotgipa kamrangni gimin department-na u·iatgen ine East Khasi Hills a·jani Deputy Commissioner parakataha.
Deputy Commissioner-ni parakatani gitade, gipin biaprangoniko ra·baenggipa na·tokrangko a·doko palna on·taigenchimoba manderangna cha·anio maming ong·jana gita salantian gipin biaprangoniko ra·baenggipa na·tokrangko porikka ra·e nijringgen.
Bang·bata manderangan Rohu na·tokkosa cha·batani gimin aro Rohu na·tokde a·songni pilak biaprangonin sokbaengani gimin a·dokona ra·baenggipa na·tokrangko sorkari nambate nirok sandianggen ineba Kurbah parakataha.
Gipin a·dokrangoniko ra·bagipa na·tokrangko porikka ra·anio formalin samrangko man·ahani gimin gipin a·dokrangoniko na·tok ra·bae palaniko sal 15-na sorkari champengatahachim ine nikna man·a.
