TURA: Agia Medhipara Phulbari Tura (AMPT) ramani Bamungdanga song sambao donggipa RCC dolong nosto ong·ahani gimin ia dolong gita metric ton 9-na bate bostu salgipa truck garirangni re·ruraaniko dontongchengchina gita PWD (R), NEC Division Tura-ni Executive Engineer u·iataha.
Ia dolong gita metric ton 9-na bate bostu salgipa truck garirang re·rurana nanggenchimode, nangana bate gatgipa bosturangko ra·onchengesa re·china gitaba PWD official u·iataha.
Ia ramara Assam-ni Mankachar aro South Salmara Sub-Division-rangko man·chape West Garo Hills a·jani a·kawe jolo donggipa dingtang dingtang biaprang, jekai Dadenggre, Raksamgre, Tikrikilla, Chibinang, Phulbari aro uandakgipa biaprangona dakanggipa mongsonggipa rama ong·a ine janapatengon, ia ramani nangchongmotgipa ong·aniko nike ia ramako PWD, kulie donna gita jotton ka·enga ine Executive Engineer parakataha.
Ia dolong nosto ong·ahani gimin manderangna mikrakataniko on·na dolongni samtangtangon chinrangko donataha aro unbaksana ia dolongo speed breaker-rangkoba donaha ine talataniko on·angengon, ia dolongko tarina gita dolongko chipatna skang, gari gorarang re·rurakuna man·na gita ia dolongni sambao subway-ko tarienga ine PWD official parakataha.
