TURA: Tura-o gital rikenggipa PA Sangma Sports Complex-ko matchotsrangkujaengon, ia stadium-ni mitam bakrang, Bristibar pringo be·ahani gimin jolo songdongenggipa bang·a manderangan sorkarini kamo kusi ong·gijaniko parakattokaha aro iani bidingo ma·mongni dolrangchi name sandirokatchina dabiangtokaha.
Bristibar pringo mikkarang jime waangani ja·man, PA Sangma Stadium-o a·arang rurongenba, ia stadium-ni mitam bak be·wakangahachim ine nikna man·a.
PA Sangma Sports Complex-ni Football Stadium-ko re·anggipa 2022 bilsini December jaosan a·dokni Chief Minister Conrad K Sangma nokdonggae on·angahachim ineba nikna man·a.
Indake ong·engon, ia stadium be·wakangani ja·man, Tura-ni MP Agatha K Sangma-ni ia stadium-ona re·ange nieani somoio ia stadium jolo songdongenggipa mande saksa, ia stadium-ko rikanirang namjani gimin una badi ka·doangaha.
“Ia PA Sangma Sports Complex-ko chu·gimik matchotsrangkujaengon, stadium-ni bang·a biaprangon be·srianirangko nikna man·engaha. Ia stadium-ko rikanio rod-rangkoba chu·onga gita on·jaha aro jeon 100 mm rod-rangko jakkalna nangachim, uarangoba 6 mm rod-rangkosa jakkalaha. Iani bidingo chinga changni chang kam ka·giparangnaba badi ka·ahachim indiba uamang chingni aganako knachakjaha. Ia stadium-ni pakmarangko name nigenchimode iano cement-na bate an·chengrangsa bang·bata. Mikkangchiba ia stadium apsan daken be·angkugen ine chinga kenchakenga,” ine jolni mande saksa Tura-ni MP-na parakataha.
Ia stadium-ko rikgipa BRC-ni manderang, gipinrangni ku·pattianirangko knachakna gisik nangjahani a·selsa da·o ia stadium be·gruna a·bachengaha ine jolni sakgipin mande parakatskaaha.
“Ia stadium-ko rikna a·bachengonin chinga kamrangko jegale, nanga gita ku·pattianirangkoba on·ahachim indiba BRC-ni manderang, chingni agananirangko knachakna gisik nangjaha aro da·alo an·ching iandakgipa a·sel ong·aniko nikna man·aha,” ine ua aganaha.
Ia stadium-ni be·gruani gimin New Tura Development Forum (NTDF)-ni dilgiparangba suk ong·gijaniko parakataha aro iani bidingo inquiry-ko dakchina gita dabiangaha.
“Nokko rikengon chongipa pakmarangnaba beam-rangko on·na nanga indiba ianode dal·dalgipa pakmarangnaba beam-rangkon on·jaha. Oe beben chinga nok rikanio expert-rangde ong·paja indiba maidake nokko rika uni giminde bang·a bang·ja ma·sipagiparang ong·a. Ia stadium-ko rikanio ma·mongni tangkarangko bang·en koros ka·ahani gimin chu·gimikkon ma·mongonin sandirokchina chinga dabienga,” ine NTDF-ni president David Ch Marak parakataha.
Ia stadium-ko rika namjani gimin a·bachengonin uamang jegalahachim ine NTDF-ni secretary LC Momin-ba parakataha.
“Ia stadium-ko rikna uamang Bhutan-oni namgijagipa ro·ongrangko aro Ringre chiringni an·cheng aro rong·srekrangkosa ra·baahani gimin chinga police-rangnaba badi ka·doangahachim. Chingni badi ka·on chingkosa ka·mikkenatpilaha indiba da·alo an·ching pilakan iani biteko nikna man·aha,” ine Momin parakataha.
