TURA: Samtangtango ong·telaigiparang, jekai sam bolrang, chiring chibisikrang, do·o matrang aro uandake mandeni samtangtango ong·telaigiparangko ripinge rakkina nangengani gimin manderangna agan-talataniko on·na gita re·anggipa June-ni 22 tariko, Garo Hills Environment Protection Society (GHEPS)-ni gita awareness program-ko, ABDK BYF, East aro West Garo Hills Wildlife Division aro Tura-ni DFO baksa nangrime Nokrek a·brini ja·reko donggipa Daribokgre songo ong·atangaha.
Ia awareness program-ko ABDK-ni Youth Director Durasal Marak dilangaha aro ia tom·anio Samanda St George Parish-ni Pamong aro GHEPS-ni advisor Rev Fr Jimberth K Marak, jinmana aganprakangengon, samtangtango ong·telaigipa buring bolgrimrang, chiring chibisikrang aro do·o matrangni gimaroroangengahani gimin an·tangni suk ong·gijaniko parakatenba, samtangtango ong·telaigiparangko ripinge rakkina gita rakbate kamrangko ka·china jolo songdongenggipa manderangko aro program-o bak ra·gipa manderangko didiangaha.
Ia program-ko ong·atanio GHEPS-ni president Dr Merril N Sangma-ba jinmana aganprakangengon, samtangtango ong·telaigiparangko ripingna kam ka·anio dingtang dingtang jat aro toromni manderangko maming mikkang niteani gri ba jat-torom baseani gri ku·cholsan ong·e kam ka·china gita ku·pattianiko on·angskaaha.
Ia awareness program-ko ong·atanio Tura-ni MDC Bernard N Marak aro GHADC-ni gitcham CEM PK Sangma-ba bakko ra·angaha aro samtangtango ong·telaigiparangko ripinganio an·tangtangni gamchatgipa agan-ku·pattianirangko on·angtokaha.
Ia program-ko ong·atanio dongpae manderangna aganprakanggipa gipin manderangara, songsalna kamko ka·gipa Roger Benny A Sangma, GHEPS-ni general secretary Junstemey R Marak, Forest officer Annie Ch Marak aro gipinrang ong·a.
