SHILLONG: Tura-o PA Sangma Stadium be·wakangani ja·man dingtang dingtang dolrang, ia stadium-ko rikani bidingo sorkariko matnangtokengon, ia stadium be·wakani bidingo preliminary report-on mamingkoba janapjahani gimin ia stadium-ko rikanio maming kam ka·sretani dongja ine Sombar salo, a·dokni Chief Minister Conrad K Sangma talataniko on·angaha.
Ia a·selni bidingo FIR ka·gipani gimin sing·on, iani bidingo sandirokna gita magisterial inquiry-ko dakchina ge·etaha aro ia stadium-ni pakma be·wakanio stadium-ni stand-rang aro gipinrangba maming nosto ong·atako man·jaha ine Chief Minister parakataha.
Chief Minister-ni parakatani gitade, ia metre 40 ong·gipa retaining wall-o chirang jokna man·jae sikkonge dongahani a·selsa ia retaining wall-ni metre 10 ong·gipa bak be·wakangahachim.
Retaining wall-ko rikaniba nangani krian ong·achim ine talatangengon, preliminary report-ni gitade iano maming ong·gija dongjachim indiba sorkari, ning·tue am·sandianiko dakna nangnikenga ine Sangma parakataha.
Magisterial inquiry-ko dakanio maiba ong·gija dakaniko nikgenchimode sorkari nanga gita ja·kurangko de·gen ineba Chief Minister ku·rachakaniko on·ataha.
