SHILLONG: District Court-rango kam ka·giparangko ra·jitna man·jana gita Mongolbar salo, a·dokni Cabinet, Meghalaya District Courts Ministerial Service 2020-ko taridapaha.
Cabinet tom·a matchotani ja·man iani bidingo kobor ra·timgiparangna talataniko on·angengon, Meghalaya District Courts Ministerial Service 2020-ko taridapahani gimin district court-rang rule 33-ko kimite galna bil man·gnok aro district court-rangoba kamrangna District Selection Committee-ni niamrangkon ja·rikangan baksana kam ka·giparangko ra·jitna man·jawaha ine a·dokni Cabinet Minister aro a·dok sorkarini ku·wattimgipa Ampareen Lyngdoh parakataha.
“Ia niamko taridapanio cabinet, rule 33-ko kimitaha aro da·ode Meghalaya District Courts Ministerial Service Rules-chi District Court-rango kam ka·giparangko ra·jitna man·jawaha,” ine Lyngdoh aganaha.
Meghalaya Delegation of Financial Powers Rule 2006-ni Schedule IV ning·o DGP, IGP, DIGP aro SP-rangna on·gipa financial power-rangko bariatna proposal on·anikoba Cabinet-ni tom·anio ra·chakaha ine Lyngdoh parakataha.
“Uni gimin da·ontal, Schedule IV of the Rule 2006-ni ning·o DGP, IGP, DIGP, SP-rangna on·gipa financial power-koba dingtang dingtang gadango bariatgnok,” ine MDA sorkarini ku·wattimgipa aganaha.
Urban department-ni ning·o a·dokni skotong Shillong songjinmako man·chape dingtang dingtang jillarangko namdapatna gita a·dok sorkari, gital project-ko ra·gatna gita tik ka·aha ineba Lyngdoh parakataha.
