TURA: Mongolbar walo, East Garo Hills a·jani Rongbang Dare samba jolo donggipa Rongsak Rangmalgre songo, mande saksa an·tangni mikchagitcham me·chikko, gario rimangenba so·otna jotton ka·ahachim indiba songni manderang ia a·sel ong·ako nikchangenba me·chikko jokatna gita man·aha.
Police-rangni u·iatani gitade, ia a·sel Mongolbar walni 7:30 bajimango ong·aha aro dosko dakgipa me·asa, an·tangni mikchagitcham me·chikko an·tangni gari ning·o so·ote galna jotton ka·ahachim.
Ia me·chikko so·otna jotton ka·engmiting somoio me·chikni chrikako knae, songni manderang ua biapona rikangaha aro me·chikko jokatna gita man·aha.
Koborko on·ani gitade, dos dakgipa me·asara, South West Garo Hills a·jani Zikzak C&RD Block-o accountant-ni kamko ka·engachim aro ua Damalgre songoni ong·achim.
Songni manderang, ua biapona re·ange me·chikko jokateani ja·man, ia mande ua biaponi gari sale katahachim ineba kobor on·timgiparang u·iataha.
Indake ong·engon, ia me·chikni ma·drangrang, Budbar salpaksachibara police-rangna FIR-ko ka·aha aro police-rang dos dakgipa mandeko rim·na man·aha ine East Garo Hills a·jani SP Siddharth Ambedkar parakataha.
Dos dakgipa mandeko da·o police-rang rim·na man·ahani gimin ia me·chikni namgnina, a·sel ong·gipani video-ko social media-rango watjojochina gitaba East Garo Hills a·jani police-rang didiataha.
