RESUBELPARA: Adita salrangna skang Tura-o PA Sangma Stadium-ni retaining wall be·wakangani ja·man da·o North Garo Hills a·jao gital rikgipa stadium damgni, chong·motan Adokgre-ni Chenanggre Stadium aro Bajengdoba-ni Hamilton Stadium-oba da·on nosto ong·na a·bachenganiko nikna man·engaha ine kobor on·timgiparang parakataha.
Kobor on·timgiparangni u·iatani gitade, Adokgre songni Chenanggre Stadium-ko rikani 60 percent-mangni gitasan matchotengkuachim indiba ia stadium-ko re·anggipa December jaon NPP-chi dilenggipa MDA sorkari, nokdonggae on·angskaahachim.
“Ia stadium-ko a·doko nambatsranggipa stadium-rangoni damsa dake rikgen ine parakatani ja·man songni manderang bang·batan kusi ong·tokahachim indiba da·alo ia stadium-ni obostako niegenchimode darangan bebera·na man·piljawaha. Ia stadium-ko rikani da·onan matchotsrangkujaenga indiba stadium-ode da·on nosto ong·na a·bachenganiko nikna man·skaengaha,” ine songni mande saksa parakataha.
Kobor on·timgiparangni u·iatani gitade, Chenanggre stadium-o damgittam dake gallery-rangko tariahachim indiba ia gallery gimikon be·srianirangko nikna man·skaengaha.
Ia stadium-ko Guwahati-oni saksa PK Agarwala minggipa contractor rikengachim indiba ia stadium-ko rikna gita badita tangkarangko chamahachim, darangba ma·sitokjaenga ineba kobor on·timgiparang parakataha.
Apsan daken Bajengdoba-ni Hamilton Stadium-koba rika matchotsrangkujaengon, re·anggipa bilsini December jao a·dok sorkari, ia stadium-koba nokdonggae on·angahachim indiba da·on ia stadium-ni bang·bata bakrangon nosto ong·na a·bachenganiko nikna man·engaha ine kobor on·timgiparang parakataha.
Koborko on·ani gitade, ia stadium-ko rika matchotkujaengoba NPP-chi dilenggipa MDA sorkari, re·anggipa December jaon nokdonggae on·ahachim indiba February jao ong·atanggipa Assembly election-ni ja·mande ia stadium-koba galchipe donanikosa nikna man·skaaiahachim.
Ia stadium-oba gallery-rangko rikahachim indiba ia gallery-rango da·on be·srianirangko nikna man·engaha ine kobor on·aha.
Ia gallery-o a·arang rurongengani a·sel da·on gallery-ni foundation-koba nikna man·engahani gimin ia gallery bang·e baijanaba gnang aro mikkarang waangkua ong·ode bakan be·gruani cholrang donga ineba kobor on·timgiparang, kenchakenganiko parakataha.
