TURA: Meghalaya a·doko Reservation Policy-ko ra·gatchengaonin Garorangna chamgimin 40 percent-ko nanga gita man·jaha ine parakatenba, reservation roster-ko ra·gatengon, Garorangni man·na nangkuenggipa bak rengsirangko man·na gita batanggimin somoirangko nipilani gnangsa ra·gatchina A·chik Conscious Holistically Integrated Krima (ACHIK) a·dok sorkariko didiatani ja·man, Constitutional Rights Forum (CRF)-ni Raksamgre aro Chibinang unit-rangba ia dabianio chakpaaniko parakataha.
Ia Reservation Roster system-ara nichanggalako man·gipa jatrangna cholrangko on·na miksonge on·enggipa niamsa ong·enga ine janapatengon, ia Roster system-ko ra·gatanichi Scheduled Caste (SC), Scheduled Tribe, Other Backward Class (OBC) aro gipin gadangni jatrangnaba apsan bak rengsiko on·na man·gen aro roster system-ko nipilani gnang ra·gatgenchimode batanggimin somoirango dakgualanirangko ba ong·gija dakanirangko taridapna cholrangko on·na man·gen ine CRF-ni Raksamgre aro Chibinang unit-rang parakataha.
Reservation Roster-ko nipilani gnang ra·gatchina sorkariko didiatenba, iani bidingo salsnini gisepon aganchakaniko on·china gita adita salrangna skangsan ACHIK, sorkarina somoiko on·angahachim.
Indake ong·engon, Roster system-ko ra·gatna gita somoiko ra·e dongchaengani giminba CRF-ni Raksamgre aro Chibinang unit-rang, sorkarini kamo kusi ong·gijaniko parakataha.
