SHILLONG: Re·anggipa Sonibar salo, South West Khasi Hills a·jani Keniong songo gari bolsa, a·kuangchi ga·akonange a·sel ong·aha aro ia a·sel ong·anio mande saksako so·otako man·e, gipin sakchet manderang saknaanirangko man·aha.
Koborko on·ani gitade, ia a·sel ong·ani Sonibar pring 11:00 bajimango ong·aha. Ua somoio ML-04B 1269 gariko, West Khasi Hills a·jao donggipa Mawlyndep songoni saksa Khrawbor Nongsiang minggipa mande salangengachim indiba Keniong songo ia gari, truck gariko overtake ka·na jotton ka·engmiting somoio maibakae a·kuangchi ga·akonangaha.
Koborko on·ani gitade, ia gari Nongstoin-oni Ranikor Civil Sub-Division-ni ning·o donggipa Amarsing songona re·angengachim.
Ia gario gimik saksku manderang dongachim aro ia sakskuoni Amarsang songni Kalbinus Nongbri minggipa mande so·otako man·aha aro gipinrang bilongbee mata bu·anirangko man·tokaha.
A·sel ong·ani ja·man saknaa man·gipa manderangko Mawkyrwat Civil Hospital-ona ra·angaha aro ja·mano nambate sanna bananiko on·na gita Shillong-ona watatskaaha.
