SHILLONG: Meghalaya a·dokni chadamberangna, uamangni changa sapanirangko namdapatna aro janggi tangani cholrangko on·na gita a·dok sorkari, dingtang dingtang chadambe dolrangna tangka paisani gita dakchakanirangko on·na miksongenga ine Sombar salo, a·dokni Chief Minister Conrad K Sangma parakataha.
Sombar salo, a·dok sorkarini a·bachengatgipa YESS Meghalaya program-ni bilsisa gapaniko manina gita Pinewood Hotel Banquet Hall-o tom·aniko ong·atanio ia kattarangko Chief Minister aganaha.
“Meghalaya a·doko darangni dakchakanirangko man·jae an·tangtang kam ka·enggipa dingtang dingtang chadambe dolrang donga aro uamang ia kamrango gisik nanggiparang ong·ani giminsa ka·enga,” ine Sangma aganaha.
Chadambe dolrang, an·tangtangni kamrangko ka·na man·na gita sorkari, tangka paisani gita dakchakanirangko on·na chanchisamsoani gnang kamko ka·enga ine janapatengon, Chief Minister-ni Secretariat-chi jako ra·e ka·enggipa YESS Meghalaya program-ko da·o Sports & Youth Affairs department-na pakwate on·angskagnok ine Chief Minister parakataha.
Meghalaya a·doko bading chiwalgiparang, doka dam·anio gisik nanggiparang, kal·susaagiparang aro jawilwatko tarigipa manderang, an·tangtangni kamrangko mesoke chadambeskarangko didina man·na gita program-rang donggen ine janapatengon, “Chadamberangko didina aro uamangni kamrangko mesokna man·na gita da·o salsa salgnini gisepon program-ko a·bachengatgnok,” ine Chief Minister parakataha.
“Chingni ra·gatgipa program-rangoni YESS Meghalaya-ba chu·sokbatsranggipa program-rangoni mingsa ong·enga aro mikkangchiba chinga sorkarini gita dakchakanirangko on·angkuna man·na gita bang·bata chadamberangko re·bae ia program-na biming segatchina anga didienga,” ine Sangma aganaha.
Ia program-ko ong·atanio YESS Meghalaya-ni Revised Guidelines-koba Chief Minister a·bachengate on·angaha aro YESS Meghalaya program-ni ning·o dingtang dingtang chadambe dolrangna cheque-rangkoba suale on·angaha.
Ia tom·anio bakko ra·anggipa gipin manderangara, Sports & Youth Affairs Minister Shakliar Warjri, Sports & Youth Affairs department-ni Commissioner & Secretary Dr Vijay Kumar D, Sports & Youth Affairs-ni Director Isawanda Laloo aro gipinrang ong·a.
