SHILLONG: A·doko bosturangni damrang nangana batpile tang·doangengon, bosturangni dam rakani ja·pangde, bosturangko anti-bajarrangona sokatbaanio pangchaka, a·dok sorkaride nangchongmotgipa bosturangko a·dokona sokatbae on·asan man·aia ine Chief Minister Conrad Sangma aganaha.
A·doko mongsonggipa bosturangko tik ong·ke sokate on·na nanga, uarangko sorkari nirokenga, ua agandapaha.
Bosturangni dam rakdatani mongsonggipa a·selde, uan bosturangko ra·baanio pangchaka, maina bang·bata bosturangni damrangkon bding-chiwalgiparangsa tik ka·a ine Conrad aganaha.
Meghalaya-ko man·chape a·songo me·su-samjak aro bolam-biterangni damrang dugapile tang·doaha ine nikna man·a. Shillongo me·su-samjakrangni dugapile dam rakengani ja·pangde Assamo chi bana re·ani a·selba ong·enga, jeni a·selan whole-sale bajarrangona bosturang komie sokenga aro uani giminsa bosturangni dam agrepile rakenga.
Unomitingo manderangna dakchakaniko on·na gita mongsongbate tourist area-rango chalaina gita electric-ni garirangko on·e manderangko dakchakgen ineba Chief Minister aganaha.
Indake ong·engon, electric garirangko jakkaltokchina gitaba a·dok sorkari manderangna didiatna namnika ineba ua aganaha.
