SHILLONG: Da·omiting Assam aro Meghalaya-ni sima arirangko sima tik ka·grikna gita a·dok damgnini gisepo agangrikanirangko dakengmiting bijangchio, Meghalayao dolsa organisation, West Jaintia Hills-ni Mukroh-o songdonggipa manderangna uamangni jakkalronggipa silchidarerangko suale on·tokaha aro suale on·gipa dolni dilgipako rim·na nangao ga·akha ine koborrango a·kange parakataha.
Kajia golmal gnanggipa Block I jolo donggipa manderangna, an·tangtangko Karbi bobilrangoniko naljoke rakkina gita uamangna chri aro brarangko suale on·aha ine Hynniewtrep National Youth Movement (HNYM) dilgipa Louis Dohtdong, uko rim·ange bichal ka·ani somoio police-na aganchakaha.
“Assam-Meghalaya sima ariogipa kajia-golmal gnanggipa biaprango songdonggipa manderangna, an·tangtangko Karbi bobilrangoniko warachakna gita chinga pong 100 bra aro pong 1000 chrirangko da·sikkari 2022 bilsioni songni manderangna sualaha” ine Dohtdong koborni manderangna aganaha. Bra aro chrirangara, Khasi jatni silchidarerang ong·a aro indake an·tangtangko chel·chakna gita uamangni jato nokantion ia silchidarerang donga ineba ua aganaha.
Dohtdong indakeba talataha je HNYM, sima ario songdonggipa manderangko slairangko jakkalna chinga didija aro uamangko chadrapao nanggitikao jakkalna gita chri aro brarangkosa jakkalchina chinga didianiko on·a,” ua aganaha.
Re·anggipa bilsi November jao Assam police-ni slai goao sakdok manderangni so·ota man·ani ja·mano, neng·nikaniko man·enggipa Mukroh-ni manderangko chri aro brarangko tik dake ra·tokchina gita uamangko didianiko, Dohtdang parakaha.
Uni kakketko ku·rachakani ja·mano, jatrangni gisepo nanggrikataniona sokatgen ingipao, Meghalaya police HNYM dilgipa Dohtdang-ni kosako mamla segataha.
