U·IATTIMGIPAONI
TURA: South Garo Hills a·jao Nongalbibra dolongoni Darang Boldak songona dakanggipa PMGSY ramako name tarijaha ine Nongalbibra-ni FKJGP dol matnangatenba, ia ramako tarigipa Assam-ni M/S Midas Construction IB company-ni kosako rakgipa ja·kurangko de·china, South Garo Hills a·jani Deputy Commissioner-na sedoataha.
Iani bidingo South Garo Hills a·jani Deputy Commissioner-na badi ka·e sedoatengon, ia PMGSY ramako tarina gita India sorkarini Rural Development Ministry tangka paisarangko chame on·ahachim indiba ia ramako name tarijahani a·sel gital tarigipa ramarang da·on nosto ong·pilengaha ine FKJGP Nongalbibra circle parakataha.
FKJGP Nongalbibra circle-ni parakatani gitade, ia km 10.78 ong·gipa ramako tarina gong 23,17,70,603/- tangkarangko chamatahachim aro ramako 2020 bilsini January jao tarina a·bachengatenba 2022 bilsini January jaon matchotatahachim.
“Kamrangkode uamang somoi gitan matchotatahachim indiba ramako tarianio jakkalgipa bosturang namsrangjani a·selan ia ramako taria matchotaoni bilsisani gisepon nosto ong·na a·bachengaha,” ine FKJGP Nongalbibra circle-ni dilgiparang parakataha.
Ia ramarang da·o nosto ong·engahani a·selan re·ruraenggipa manderang aro mongsongbate skulrangchi re·enggipa chatro chatrirang neng·nikanirangko chagrongna nangtokengaha ineba FKJGP parakataha.
Ia ramara dingtang dingtang songrangko nangdimeatgipa rama ong·e songni nokni manderangna namen mongsonggipa rama ong·engachim ine janapatengon, ia ramako tarigipa company-ni kosako ta·raken ja·kurangko de·china aro ia ramako taripiltaina gita ge·etaniko on·china FKJGP Nongalbibra circle, South Garo Hills a·jani Deputy Commissioner-ko didiataha.
