U·IATTIMGIPAONI
TURA: Re·anggipa Budbar attamo, West Garo Hills a·jani ning·o donggipa Nimaikata songni nok te·saoniko police-rang, heroin samrangko man·ani ja·man, sam badingenggipa mande sakgnikoba rim·na man·aha.
Ia jolrango niam gri sam badingenggipa manderangni gimin koborko man·soani ja·man Phulbari Police Station-ni dolsa sipairang, Nimaikata songni nok te·saoniko sandion, ia nokoniko gram 6.51 ong·gipa heroin samrangko man·aha ine police-rang kobor on·aha.
Koborko on·ani gitade, police-rangko ua biapo niksoon, sam badinggipa manderang ua biaponi katna jotton ka·ahachim indiba police-rang uamangko rim·na man·aha.
Rim·ako man·gipa manderangara, Phulbari Nimaikata songni bilsi 24 ong·gipa Rahul Islam aro bilsi 46 ong·gipa Romison Nesa ong·achim ineba kobor on·aha.
Ia nokoniko police-rang, sam badingna jakkalgipa bike bolsa aro sam badinge man·gipa gong 55,500 tangkarangkoba man·aha ine kobor on·aha.
Indake ong·engon, iani bidingo police-rang case-ko segatenba, am·sandianirangko dakengkua ine police official-rang u·iataha.
