U·IATTIMGIPAONI
SHILLONG: Sukrobar pringwalni 1:00 ba 1:30 bajimango, dolgni manderang, Shillong songjinmani Laitumkhrah jolo bilongbee dinggrikaha aro ro·ongrangkoba gogrikaha ine kobor on·aha.
Koborko on·ani gitade, ia dolgni manderang, Laitumkhrah-o donggipa DHS office sambao dinggrikaha.
Iandake dolgni dinggrikani ja·man, ka·a ding·chaogipa manderang, Police Station compound-onaba napange, police-rangni garirangko so·chipe galaha.
Indake ong·engon, police-rangni garirangko so·anio jak donggipa manderangko police-rang ma·siaha ine East Khasi Hills a·jani SP Sylvester Nongtynger, kobor ra·timgiparangna parakataha.
Laitumkhrah jolrango da·o obostarang nampilaha ine parakatengon, police-rangni garirangko so·anio jak donggipa manderangni bimingrangko da·o dipet police-rang parakna man·kujawa ine Nongtynger parakataha.
Ua somoio CRPF sipairangko nangana bate jakkalaha ine matnanganiko jegalatengon, mitam manderang, CRPF sipairangni silchidarerangko ra·sekna jotton ka·ahachim ine SP parakataha.
Ia a·sel ong·anio badiaba NGO-rang jak dongama dongja name aganna gita man·kujawa ine talataniko on·angengon, da·o ia a·selni bidingo sandirokanirangko dakengkua ine Nongtynger parakataha.
Iana skang, a·dokni Health Minister aro jolni MLA Ampareen Lyngdoh-ba ia a·selni bidingo, East Khasi Hills a·jani SP aro SP (City) Vivek Syiem baksa tom·e agangrikangaha aro ia tom·anio Laitumkhrah-Malki-ni MDC Fantin Lakadong-ba dongpae bakko ra·angaha.
