U·IATTIMGIPAONI
TURA: India sorkarini dingtang dingtang scheme-rangko ra·na gita da·o Aadhar-ko nangchongmotengahaoba Meghalaya a·doko bang·bata manderangan Aadhar-na biming segatna gita gisiko nangtokjaenga gita nika maina PM Poshan-ni namgnirangko man·enggipa manderangoniba Aadhar baksa link ka·ani da·onan 49 percent-san ong·kuengpiti.
Iako Meghalaya School Education & Literacy-ni Director Swapnil Tembe, an·tangtangni dedrangko Aadhar-na biming segatenba ta·raken skulni skigiparangna on·china didiatanio jinmana parakataha.
PM Poshan ba jekon skango Mid Day Meal (MDM) scheme ine mingachim, ia scheme-ni namgnirangko ra·na man·na gita ta·raken skulo poraienggipa bi·sarangko Aadhar-na biming segatchina gita bi·sarangni ma·a paa aro bi·sarangni guardian-rangko didiatengon, sorkarini iandakgipa scheme-rangna Aadhar-ko link ka·aniara kamrangko altubatata aro nambate sokatna dakchakanirangko on·a ine Tembe parakataha.
PM Poshan scheme-nasan ong·aigija mikkangchi chatro chatrirangni dingtang dingtang scheme-rang, jekai skulni scholarship-rangko man·na aro uandakgipa namgnirangko ra·na gita Aadhar-ko nangtelgnok ine School Education & Literacy-ni Director parakatenba, ta·raken chatro chatrirangko Aadhar-na biming segatchina gita didiataha.
“Da·o dipet PM Poshan-na Aadhar baksa link ka·ani 49 percent-san ong·kuengpiti, uni gimin ia scheme-ni namgniko ra·na man·na gita ta·raken skulo poraienggipa chatro chatrirangko Aadhar-na biming segate, Aadhar number-rangko skigiparangna on·china didiatenga,” ine Tembe parakataha.
