U·IATTIMGIPAONI
TURA: Re·anggipa Sonibar salo, Tura jillani dingtang dingtang Kristian mondolirangni bakrime bikotgipa Alliance of Christian Churches (ACC)-ni gita Goshen Blessing Foundation baksa bakrime, chatro chatrirangna career counselling program-ko Tura Dakopgre-o donggipa Tura Town Church-o ong·atangaha.
Ia program-ko ong·atanio secondary level-oni graduate level-ona kingking chatro chatrirang bakko ra·angtokaha aro uamangna Tura-ni social activist Roger Benny A Sangma, Shillong Union Christian College-ni Assistant Professor Dr Jim Carbrist P Marak aro Dadenggre Civil Sub-Division-ni Assistant Commander Dr Rikrak N Marak, dingtang dingtang katta bichongrango pangchake, agan-talate on·anirangko dakangaha.
Ia career counselling program-ko ong·atanio Garo Hills-ni social activist Roger Benny A Sangma, chatro chatrirangna agan-ku·pattianirangko on·angengon, Civil Service, UPSC, MPSC, DSC aro uandakgipa porikkarangna an·tangtangko maikai tarisamsona gita nangachim, uarangni bidingo agan-talate on·angaha.
Uni ja·man Shillong UCC-ni Assistant Professor Dr Jim Carbrist P Marak, chatro chatrirangna agan-ku·pattie on·angskaengon, ‘Enhance knowledge, skills, attitude to fit Career Choices’ katta bichongo pangchake agan-skie on·angskaaha.
Bon·kamao, Dadenggre Civil Sub-Division-ni Assistant Commissioner Dr Rikrak N Marak-ba chatro chatrirang baksa agangrikengon, an·tangtangni kamo on·kangani (dedication), ka·oksiani (determination) aro namgipa bewal (discipline) dongchina gita didianiko on·angaha.
