U·IATTIMGIPAONI
SHILLONG: Robibar attamo, New Shillong Township-ni Umsawli-o gital rikenggipa Institute of Science & Bio Resource (ISBR)-o me·chik saksako man·chape mande sakgittamni manggisiko man·aha.
Sigipa manderangara Mawlai Phudmuri-oni bilsi 40 ong·gipa Sheba Kharbani, bilsi 43 ong·gipa Rupert Donbor Dohtdong aro bilsi 30 ong·gipa Backstar Kharkrang ong·achim ine ma·sina man·aha.
Koborko on·ani gitade, sianggipa mande sakgittaman ISBR-o kamko ka·giparang ong·achim aro uamangoni Sheba aro Rupert-de rongtalatgiparang aro Backstar-de chowkidar-ni kamko ka·gipa ong·achim.
Me·chikni manggisikode kuturi ge·saoniko man·aha indiba me·asa sakgnini manggisikode nangchapgipa kuturioniko man·skaaha.
Ia a·selni bidingo, ia nokko rikenggipa contractor, Robibar attamni 5:30 bajimango Mawdiangdiang police outpost-na kobor on·atani ja·man, police-rang sokbae sandiani ja·mansa ma·sina man·ahachim.
Ia gital rikenggipa building-ni skanggipa gadango donggipa kuturi ge·gittamoni chaktogijagipa bibako man·engani gimin ia contractor, police-rangna kobor on·atchengahachim.
Ia kuturirangko ning·achini ketani gimin police-rang, jolni nokma aro mikrontangchi nikgipa manderangni mikkango, do·gako pe·e kulina gita nangaha ine kobor on·aha.
Ia manderangni gimin sing·sandion, sianggipa manderangoni sakgnide, re·anggipa Bristibar salo, sambao donggipa buringoniko me·gimu am·na re·angahachim ine police-rang ma·sina man·ahani gimin uamang bisi donggipa me·gimuko cha·esa siahakon ine police-rang chanchichipenga. Kuturi ge·saoniko police-rang, song·gimin me·gimu baksa me·dik ge·sakoba man·ahachim ine kobor on·aha.
Ia biapona Sector officer Jyoti Wahlang baksana crime scene unit aro forensic dolni manderangba re·bae, name am·sandianirangko dakna a·bachengataha.
Indake ong·engon, ia mande sakgittamni manggisirangko post mortem ka·na gita NEIGRIHMS-ona ra·angaha.
