U·IATTIMGIPAONI
TURA: Ma·mong sorkarini ra·gatna miksongenggipa Uniform Civil Code (UCC)-ara India a·songo songdongenggipa Tribal jatrangna aro mongsongbate A·chikrangni daka rikanio namen neng·nikanirangko ra·bana sienggipa niam ong·enga ine A·chikrangni sea jotaniko namdapatna kam ka·enggipa A·chik Literature Society (ALS)-ba UCC-ko raken jegalataha.
Ma·mong sorkarini Parliament-ona ra·angna miksongenggipa UCC Bill-ko jegalatengon, A·chikrang aro pilak Tribal jatrang chengonin, jatni man·rikbagipa daka rikani, gana chinani, cha·ani ringani, bebera·ani aro niam retirang baksa gipin jatrang baksa tom·tomaon janggi tangpaengachim indiba UCC Bill-ko ma·mong sorkari pass ka·e niam dakatna nanggenchimode, jatni daka rikani pilakkon ra·seka gita ong·gnok ine ALS-ni dilgiparang suk ong·gijaniko parakataha.
“Tribal-rangara Indian Constitution-ni Sixth Schedule ning·o chel·chakako man·enggiparang ong·ani gimin Constitution-ni ning·o on·gimin bil gita Sixth Schedule a·jao songdongenggipa Tribal-rangnade ia UCC-ko nangatjachina chinga mol·molenga,” ine ALS parakataha.
A·chikrangara me·chikrangchiko chatchi de·gipa aro me·chikrangna gam-jinrangko on·rikgipa songsal ong·a ine talatanikon on·angengon, iandakgipa bewalko bang·bata jatrangan ja·rikjani gimin namen dingtangmanchagipa ong·a ine ALS parakataha.
“Uni gimin India a·song gimiko songdongenggipa Tribal-rang aro mongsongbate A·chikrangni namgnina UCC-ko ra·gatjachina chinga mol·molenga,” ine ALS-ni dilgiparang parakataha.
