U·IATTIMGIPAONI
TURA: Reservation Roster-ko backlog policy-o ra·gatchina dabie okumu chake jingjengatengon, Tura-ko Winter Capital songchina dabienggipani bidingo A·chik Conscious Holistically Integrated Krima (ACHIK), a·dokni Chief Minister Conrad K Sangma-na gisik ra·attaianiko on·angaha.
Iani bidingo a·dokni Chief Minister-na gisik ra·attaianiko on·angengon, Tura-ko Winter Capital songgenchimode Garo Hills-oba kamrangko nambate nirok sandina man·gen aro Garo Hills-o namroro silroroani kamrangko bilakbatatna man·gen ine ACHIK-ni president Thomas M Marak parakataha.
“Tura-ko Second ba Winter Capital songchina dabiengani mongsonggipa miksonganiara Garo Hills-o pilakni gitan namroro silroroaniko ra·bana nangengani giminsa ong·enga. Garo Hills-o rama jal·langrang aro pilak biaprangon namroro silroroaniko nikna man·jaenga indiba Tura-ko Second ba Winter Capital songgenchimode iandakgipa namroro silroroanirangko nikan baksana janggi tangani cholrang aro manderangni janggi tangani gadangrangba tang·dopana man·gen,” ine ACHIK-ni president parakataha.
Tura-ko Winter Capital songanichi Garo Hills-o namroro silroroaniko ra·baan baksana jatni daka rikani aro samtangtango ong·telaigiparangko mesokna cholrangko man·anichi iandakgipa namdapatani cholrangkoba man·gen ineba ACHIK parakataha.
