U·IATTIMGIPAONI
TURA: Bangladesh a·songona niam gri gari bolgittamo salangenggipa matmarangko rim·rikani ja·man, West Garo Hills a·jani police-rang, niam gri matchu matte badingenggipa dolsa manderangko rim·na man·aha.
Koborko on·ani gitade, ia gari bolgittamoniko police-rang, mang 50 matmarangko rim·na man·aha.
“Bangladesh a·songona niam gri badingatna gita Patharkata-oni Hallidayganj-ona bang·bea matmarangko ra·angenga ine Bristibar salo, Phulbari-ni police-rang kobor man·soaha aro uandaken chinga Phulbari-AMPT ramao, re·ruragipa garirangko sandirokna a·bachengaha. Ia ramao sandirokengmiting somoio police-rang, pick up gari bolgittamko rim·aha aro ia garirangoniko mang 18 matmarangko man·aha,” ine West Garo Hills a·jani SP VS Rathore parakataha.
Ia matma salangenggipa manderangko rim·ani ja·man police-rang ning·tubate am·sandianirangko dakenba gimik mang 50 matmarangko rim·na man·aha ineba SP parakataha.