Resubelpara: Health aro agriculture department-rangni ja·pango je ong·a a·sel-obosta ba neng·nikanirangko nirokna gita Meghalaya-ni Health Minister Dr M. Ampareen Lyngdoh mijal salni bako North Garo Hills district-ona re·angaha aro Mendipathar-ni dingtang dingtang songsalni nanga kamrangna jakkalgipa hall-o official-rang aro a·jolni game-sue cha·giparang baksa agan-chanchigrikangaha.
Dr Ampareen Lynghdoh, health department-ni official-rangna aganao gipin gipin scheme-rangni gisepo Chief Minister’s Safe Motherhood Scheme (CMSMS)-ni gadangko ua nipilangan baksana  ma·gipa aro bi·sani namgnini bidingo aganaha.
Health department-ni mesokgipa an·o donggipa ma·gipa aro awa bi·sa bakgitchak sia-bon·ani rate-ni report-ko janape, CMSMS scheme, Infant and Maternal Mortality Rate-ko komiatna misison mode ong·a indakgipa bang·a ma·gipani be·en-bimang an·seng bajole donganina nirok-simsakani kamrangna namgni ong·ani bidingo manderang dal·e ra·na nanga ine ua aganaha.
A·jolo gimikni gitan be·en-bimang an·seng bajole dongani gadang ba obostako namdapatna pilak daitoko jako kam ka·giparangni jak on·paanichi namgni ong·gipa kam ka·anirangko a·palbatatchina minister health department-na agan-ku·pattiaha.
Chanchigrikani tom·ao sagipa-ding·giparangko sanrongbewal kamrangni bidingo dingtangenggipa bewalni giminba chanchigrikaha aro sagipa-ding·giparangna namgipa didianiko on·a nangchongmota aro uamango be·enni gita neng·nikanirang donga ong·ode uarangko agane-skie on·a nanggen.
Ja·mano minister, miksonga donggipa scheme aro ma·mongni gita dakchakenggipa scheme-rangni bidingo agriculture aro horticulture-ni official-rang baksa namedake chanchigrikangaha.
Meeting-o game-sue cha·giparang uamangni ge·a-gamanirango man·enggipa neng·nikanirangko aro ra·bianirangko minister-ni mikkango agana gita cholrangko man·aha.
District-ni  MLA-rang, Timothy D Shira, Deputy Speaker aro Resubelpara MLA, Marthon J Sangma, Mendipathar MLA, Bajengdoba MLA Pongseng Marak aro Kharkutta-ni MLA Rupert Momin-maangba meeting-o dongpaaha.
Health aro Agriculture Minister baksa Mission Director, National Health Mission-ni Secretary RamKumar S aro Joram Beda, Commissioner & Secretary Health & Family Welfare department-ni Joram Beda-mang re·angpaaha.
