TURA: A·dokni Garo Hills Deficit School Teachers and Employees Association (GHDSTEA) aro Khasi Jaintia Deficit School Teachers Association (KJDSTA) banner-ni ning·o deficit school skigiparang uamangna chanchigipa bang·a namgnirangko niatchina Education Minister Rakkam Sangma-ko gronge uko didie memorandum-ko on·aha.
Skigiparang uamangni memorandum-o ru·uta sal somairangna Fifth Pay Commission-chi gong lak 10-ni Death cum Retirement Gratuity (DCRG)-ko bariatna bilko on·aniko janapaha. Jedakode ua namgniko nikangna man·a iako niatchina uamang Sangma-ko didiaha.
Bangki man·a nangenggipa ROP Arrear-ni chang brigipakoba on·gija donchipenga indake man·adipet ta·rake ukoba matchote on·china skigiparang didiaha. Skigiparangni aganani gita 2018 bilsi June 21-o u·iatani gita man·a nanggipa arrear bilsignina skangon matchotani ong·ahachim.
Memorandumo skigiparangni minggipin dabianirang dormaharangko jaanti on·china, kamni niamrangko ra·gatchina, MACPS, Medical reimbursement aro gitalgipa subject-rangna on·atgipa post-na kam nakatatchina ugita Fifth Pay Commission-ni gipin ra·chake bil on·anirang gita chu·sokatchina iarangko man·gope uamang dabiaha.
