TURA: Re·anggipa Sombar attamo Tura-ni Mini Secretariat ba Chief Minister’s Office (CMO)-ko manderangni ro·ong goe chadrapanio saknaa man·gipa sipai sakprakna gong 50,000/- ka·e on·gen ine a·dokni Chief Minister Conrad K Sangma parakataha.
Chief Minister-ni parakatani gitade, so·sojengjeng ong·anio saknaa man·gipa sipai sakprakna Chief Minister’s Special Grant (CMSG)-oniko gong 50,000 ka·e on·gen aro uamangko sanna bananio korosrangkoba sorkarian gamgen.
“Saknaa man·gipa sipairangna anga CMSG-oniko medical allowance dake sakprako gong 50,000/-ko on·gen aro uamangko sanna bananio nanggipa korosrangkoba sorkarian gamgen,” ine Chief Minister parakataha.
Ia a·sel ong·anina an·tangni suk ong·gijaniko parakatengon, batanggimin somoirangode Garo Hills-o iandakgipa a·sel ong·anirangko nikrongjachim aro ia a·sel ong·anio badiaba dolni manderangsa jak dongna nanga ine Chief Minister parakataha.
“Ian namen ong·nanggija a·sel ong·aha indiba police-rang an·tangtangni kamko name ka·aha,” ine Sangma police-rangko mittelpile aganaha.
Sombar attamo, Garo Hills-ni A·chik Conscious Holistically Integrated Krima (ACHIK) aro dingtang dingtang dolrang baksa a·dokni Chief Minister Conrad K Sangma, Tura-ko Winter Capital songchina aro Reservation Policy-ni roster system-ko nipilani gnang ra·gatchina dabienggipani bidingo Tura-ni Mini Secretariat-o agangrikengmiting somoio rang·san ka·a ding·chaoenggipa manderang, Mini Secretariat ning·achi napna jotton ka·e aro ro·ongrangko goani a·sel adita sak police-rang saknaanirangko man·na nangahachim.
Mini Secretariat-ko ro·ong aro chokkirangchi goan baksana manderang, ambulance bolsa aro ua biapo okumu chakenggipa manderangni pandalkoba so·e galahachim.
