TURA: Adita salrangna skang, Tura-o so·sojengjeng ong·anggipani bidingo dingtang dingtang dolrang, adita salrangni gisepon jinma tom·bimonganiko ong·atna sienga ine social media-rango jangbingbangataniko West Garo Hills a·jani Deputy Commissioner Jagdish Chelani jegalatenba, iandake tol·e jangbingbangatanirangko bebera·jachina manderangko didiataha.
Da·o ong·enggipa obostani bidingo dingtang dingtang bakrimgimin dolrang, media-na u·iatani ja·man Tura-ni Te·teng A·ja ba College Field-o jinma tom·aniko ong·atanggen ine ma·sina man·gijagipa manderang, social media-rangko watpripraengachim ine nikna man·a.
Indake ong·engon, iandake social media-rango see watenggipara tol·e jangbingbangatanisan ong·aia ine Deputy Commissioner talataniko on·angenba, ia kattarangko bebera·jachina aro janapgimin biapona jinma re·angjachina gita manderangko mol·molataha.
Iandake social media-rango tol·e jangbingbangatanirangko bebera·jachina manderangko didiatengon, tol·e jangbingbangatenggipa manderangni kosako rakgipa ja·kurangko de·gen ine Chelani mikrakataniko on·ataha.
Tura-ko Winter Capital songchina aro Reservation Roster-ko backlog policy gnang ra·gatchina dabienggipani bidingo a·dokni Chief Minister Conrad Sangma, re·anggipa Sombar attamo, dingtang dingtang dolrangko gronge agangrikengmiting somoio rang·san so·sojengjeng ong·anirang ong·katahachim ine nikna man·a.
Ia obosta ong·ani ja·man so·sojengjeng ong·atanio jak donggipa bang·a manderangkon police-rang rim·na man·ahachim.
