NEW DELHI: Meghalaya a·dokni anarosrangko gipin biaprangona wataniko bariatna gita Meghalaya sorkari, re·baenggipa August jao Pineapple Festival-ko New Delhi-o ong·atna sienga.
Ia Pineapple fest-ko August-ni 15 tariko a·songni Independence Day ba jakgitelaniko salko maniani ja·man ong·atgen aro ia festival-ko ong·atanio Delhi-ni manderangna, Meghalaya a·dokni anarosrangko cha·e nina cholrangko on·gen.
Khasirangni bolam biterangko gipin biaprangona watanio chu·sokgipa ong·ahani gimin Meghalaya sorkarini ning·o donggipa Agriculture & Farmers Welfare department aro Meghalaya Basin Management Agency (MBMA), a·dokni ton 1.3-na baten anarosrangko Middle East-ona watna gita market link-rangko tarie on·ahachim.
Meghalaya a·dokni anarosrangko Middle East a·songrangona watna a·bachengahani gimin da·o a·dokni anarosrangko Dubai, Kuwait aro Sharjah songjinmarangoba palengaha aro ian a·doko game ge·e cha·giparangnasan ong·aigija a·dok gimikni manderangnaba mikkim rasongni ong·engahachim.
Re·anggipa bilsio ton 40-na baten a·dokni anarosrangko Europe aro North America-rangona watskana gita Karnataka a·dokni processor-ona watatahachim aro ia bilsioba ia apsan processor-an, Ri Bhoi a·jani Umdihar songo donggipa Umdihar IVCS-o mobile processing unit-ko kulie, skanggipa antini gisepon ton 23-na baten anarosrangko tariaha.
Meghalaya sorkarini dakchakanichi, East Garo Hills a·jao donggipa Silchang Dimrimbri Palwa Ading IVCS-ba ton 1.3-na baten anarosrangko Middle East a·songrangona watatna man·aha.
