GH-o drop-out rate batengani gimin Rakkam, official-rang baksa agangrikanga  

Tura: Garo Hills-o school drop-out rate batengako nikna man·engani gimin uko maidake namatna ba komiatna man·gen, ia miksonganio Sonibar salo Meghalaya-ni Education Minister Rakkam A Sangma-ni dongpanio consultative meeting-ko ong·ataha. Tura Circuit House-o ong·atgipa meeting-o elementary school teacher ba skigiparang aro Garo Hills-oni Education Department-ni official-rang bakko ra·angaha. Maini a·sel school drop out rate batrikrikenga aro maidake ia rate-ko komiatna man·gen iani bidingo meeting-o chanchirimangaha.
Chanchirimaniko a·bachengdilangaon Education Minister Rakkam Sangma, Garo Hills-o school drop out rate batrikrikengani gimin parakatengon, primary aro secondary level ge·gnion drop out rate bang·a, ian niatgenchimode a·jani namroro-silroroaniko champenggipa ong·a, uni gimin iani bidingo name dake chanchirime ja·kuko de·na nangenga’ ine aganaha.
Sorkarini gimik schoolrang aro skigiparangko name dake nianggen aro apsan dakgipa ba uniform teaching module-ko ra·baenggipa salrango ja·rikgen, jedakode bi·sarangna nambata education-ko on·na man·gen ine janapate Minister Rakkam Sangma, teacher-rangkoba rakbate kam ka·china didiangaha.
Consultative meeting-o education minister, school teacher aro official-rangni gisepo ‘open discussion’-ko donaha. Gimikan an·tangtangni u·ianiko ba agan-ku·pattianirangko on·angaha. Drop out rate batengani ja·pangara bilgrigipa infrastructure, skie ba training donggijagipa skigiparang, socio economic factor ba uandakgiparang education-ni quality-o nangchakenga ine chanchirimanio u·ina man·aha.
Iarangni gisepon Educere Secondary School, Williamnagar-ni Principal Gamchi T R Marak, meeting-o bak ra·e chanchirimanio, education-ni quality-ko namdapatna poraigiparangko aro skigiparang, apsan ong·e re·mikkangna nanggen aro skiani bewalrangkoba dingtangatna nanggen ine aganaha. Iarangna agreba songsalni gita ma·a-paarang aro jolni community-rangba edcution system-o bakrimna nanggen, unosa bi·sarangni education nambatgen ine agankuaha.
Indake ong·engon MBOSE Tura-ni Executive Chairman Ambrose Ch Marak, West Garo Hills Tura-ni Deputy Commisisoner Jagdish Chelani, Tura Municipal Board-ni Chairman J D Sangma, Additiona Deputy Commissioner WGH Rezia Ch Sangma, Don Bosco College-ni Principal Rev. Fr Threnius Sangma, Education Department, MBOSE, DIET, Tura-ni official-rangba meetingo bak ra·e Garo Hills-ni education sector-ko namdapatna an·tangtangni u·ianirangko agan-ku·pattiangaha.
Uandake meeting-o chanchibewalanio Garo Hills-ni education -ko namdapatna gita infrastructure-ko bilakatna nanggen unbaksana curriculum adaptation, teacher training ba uandakgiparangko ra·bana nangnikaniko agangrikangaha.