SHILLONG: Bristibar saloni a·bachenge, North East India-o Community Based Tourism ba jatrango pangchakgipa tourism-ni gimin IIM Shillong-ni ning·o donggipa Dr APJ Abdul Kalam Centre for Policy Research & Analysis-ni gita salgnini Symposium-ko ong·ataha aro ia symposium ba tom·bimonganiko Nagaland sorkarini Tourism Minister TemjenImna Along, mongsonggipa sokgipa ong·e bakko ra·angaha.Ia program-ko a·bachengatanio Nagaland a·dokni Tourism Minister, jinmana aganprakangengon, dingtang dingtang songrangoba tourism-ko dake nina nangani gimin aganangenba, tourism-ni kamo a·palrarachide chalaina man·jawa ine talataniko on·angaha.Salgro salaram a·dokrango gipin a·dokrangni tourist-rangna aro gipin a·songni tourist-rangna cha·tote nina on·na nangchongmota ineba ua aganaha.Batanggimin bilsi 10-ni gisepo, salgro salaram a·dokrango bang·en dingtanganiko nikna man·aha ine janapatengon, ia a·dokrangni gisepo rama jal·langrangko namdapatanichi tourism-koba dingtangatna man·aha ine Along parakataha.Salgro salaram a·dokrango bang·bata biaprangkon manderang nikkujaenga ine janapatengon, ia jolrango tourism-ko tang·doatna gita link-rangko tarikuna nangenga aro jatni daka rikanirangko tang·doatna nangenga ine Nagalang Minister aganaha.Ia program-ko ong·atanio dongpae jinmana aganprakanggipa gipin manderangara, IIM Shillong-ni Director Prof DP Goyal, NEC-ni IRS G Panmei, IIM Shillong-ni BoG Member Atul Kulkarni aro gipinrang ong·a.Ia symposium-ko matchotani somoio Meghalaya a·dokni Tourism Minister Paul Lyngdoh, mongsonggipa sokgipa ong·e bakko ra·angskagen.
