SHILLONG: Tourism aro Inner Line Permit (ILP) minggnian dingtang dingtang kamrangsa ong·a aro ia minggnini gisepo nangchakgrikani dongja ine Budbar salo, a·dokni Chief Minister Conrad K Sangma parakataha.
A·doko niam gri napsrukanirangko champengani bidingo sing·anina ua ia kattarangko aganaha.
“An·ching Tourism-ko ILP baksa nangatna nangja maina ia minggnian dingtang dingtang kamrangsa ong·a. Oe beben, ia minggni kamni gisepo nangchakegrikanide dongaia maina ILP-ni kamo mitamna permission-ko nanga indiba ia minggni kamrangko nangchakgrikatna nangani katta dongja. Tourism-ara a·doko kajina man·aniko bariatna aro kamrangko ka·e cha·na cholrangko on·enggipa ong·a aro a·doko tourism-ko tang·doatna gita sorkari rake kamrangko ka·angkugen,” ine Sangma aganaha.
Niam gri napsrukanirangko champengna gita dingtang dingtang cholrang donga ine janapatengon, “ILP-ba ia cholrangoni mingsa ong·a aro ia apsan niamkon a·songni gipin biaprangoba jakkalenga. Iano pangchakesa chinga Assembly-o resolution-ko pass ka·aha,” ine Chief Minister parakataha.
A·doko niam gri napsrukanirangko champengna gita ILP-na resolution-ko ra·an baksana sorkari, Meghalaya Residents Safety & Security Act (MRSSA)-ko pass ka·aha ineba Chief Minister parakataha.
“ILP-na agreba chinga MRSSA-ko pass ka·manaha aro iako Governor-ona watatamanaha. Uni gimin a·dokona niam gri napsrukanirangko champengna gita chinga dingtang dingtang cholrangko ra·bana jotton ka·enga indiba ua pilakan India sorkarini jakosa ong·aia. Chinga ILP aro MRSSA-ni gimin changni chang ma·mong sorkari baksa agangrikna jotton ka·aha,” ine Sangma aganaha.
