SHILLONG: Shillong songjinmako Smart City project-ni kamrango namjabatsranggipa dam 10 songjinmarangoni damsa ong·enga ine biming minganiko a·dokni Deputy Chief Minister Sniawbhalang Dhar jegalataha.
Iani bidingo kobor ra·timgipa manderang baksa agangrikengon, Shillong-o Smart City project-ni kamrangko ka·ani namsrangjade ong·jaenga ine Dhar parakataha.
Shillong-ko Smart City project-o namjabatsranggipa dam 10 biaprangoni damsa ine minganiko jegalatengon, Smart Road project-ko dingtang dingtang line department-rang baksa nangrime kam ka·na nangengani a·selsa kamrang ka·sinenga ine Deputy CM talataniko on·angaha.
Ia project-rangni bidingo ua bakan tom·aniko ong·atenba project-rangko nipilanggen ine janapatengon, Polo aro Laitumkhrah-o rikenggipa market project-rang namen matchotangenga ine Deputy Chief Minister parakataha.
Ming 8 Smart City project-rangoni bang·batakon matchotangengaha ineba ua parakataha.
Smart Road project-rangni kam ka·sinenganiara jajrengna nangani ong·enga ine janapatengon, kamna nanggipa bosturangko apjitaniosa bang·a ra·bianirangko chagrongna nangenga ine Dhar parakataha.
Smart City project-ni kamrangko chu·sokatanio namjabatsranggipa biaprangoni Shillong-ba damsa ong·enga ine adita salrangna skangsan Housing & Urban Affairs Ministry parakatahachim.
Smart City project-ni kamrangko chu·sokatanio namjabatsranggipa ine Ministry-ni parakatgipa gipin damsku biaprangara, Aizawl, Amaravati, Diu, Greater Warangal, Guwahati, Imphal, Kavaratti, Port Blair, aro Puducherry songjinmarang ong·engachim.
Ministry-ni report-o parakani gitade, ming 96 Shillong Smart City project-rangoni mingsasan matchotengkuachim.
Ia project-rangna gimik gong kror 1,039 tangkarangko chamahachim.
Shillong Smart City project-na gong kror 349-kode re·anggipa February jaon chame on·atahachim.
