U·IATTIMGIPAONI
TURA: South Garo Hills a·jani Chokpot jolo donggipa Dareng chiringoniko ro·ong bikotengani a·sel samtangtango ong·telaigiparangna aro jolo songdongenggipa manderangna nangchakeaniko ra·baengani gimin Chokpot Vigilance Committee (CVC)-ni membor-rang, a·dokni Chief Minister Conrad K Sangma-ko grongenba, Dareng chiringo ro·ong bikotaniko champengatchina mol·molangaha.
Chokpot Vigilance Committee-ni parakatani gitade, Dareng chiring samba jolrangonikon ro·ong bikotengani a·sel chiring chibisikrangna aro chio donggipa ma·manti jonturangna nangchakeaniko ra·baan baksana Dareng chiringo pangchake janggi tangenggipa manderangnaba neng·nikanirangko ra·baani gita ong·engachim.
“Dareng chiringoniko ro·ong bikotengani a·sel samtangtango ong·telaigiparangna aro jolo songdongenggipa manderangnaba neng·nikanirangko ra·baengani gimin chinga iani bidingo Chief Minister-na talate on·angaha,” ine Chief Minister-ko grongeani ja·man Chokpot Vigilance Committee-ni chairman Jeshwell Ch Marak parakataha.
Ia Dareng chiringoniko ro·ong bikotna a·bachengaonin jolo songdongenggipa manderang changni chang jegalanirangko dakahachim indiba da·alonan ia chiringoniko ro·ong bikotaniko dontongkujaengani a·sel ia chiringo pangchake janggi tangpaenggipa songni manderang bang·en neng·nikanirangko chagrongna nangtokenga ineba Marak parakataha.
Indake ong·engon, ia chiringoniko ro·ong bikotaniara Environmental Protection Act 1986-ni ning·o dongimin niamrangko pe·ani ong·genchimode ia chiringo ro·ong bikotaniko ta·raken champengatna gita a·dokni Chief Minister, Chokpot Vigilance Committee-na ku·rachakaniko on·ataha ineba Marak parakataha.
Iani bidingo Chokpot Vigilance Committee, Chokpot-ni MLA Sengchim Sangma-koba gronge agangrikaha aro uaba iako niatna gita ku·rachakaniko on·ataha ine u·iataha.
