U·IATTIMGIPAONI
TURA: Adita salrangna skang, Central Agricultural University (CAU)-ni ning·o donggipa Tura-ni College of Community Science-o Food Science & Nutrition Department-ni gita Jackfruit Processing ba te·brongoniko ma·manti cha·ani bosturangko tarina jakkalgipa gital bosturangni bidingo skie on·na gita dingtangmancha training program-ko salgnina ong·atangaha.
Batanggimin bilsirangonin ia college-ni ning·o donggipa Food Science & Nutrition Department-ni gita te·brongoniko ma·manti cha·ani ringani bosturangko tarina a·bachengate, iani bidingo sak 200-na baten manderangna skie on·engahachim.
Ia program-ko ong·atna gita MBDA, PRIME aro DCIC-ni gita dakchakaniko on·angaha aro ia program-ko ong·atanio, College of Community Science-ni Assistant Professor Dr Natasha R Marak, gital kolrangko jakkale maikai te·brongoniko ma·manti cha·ani aro mongsongbate chips-rangko tarina nangachim, uarangni gimin bak ra·gipa manderangna skie on·angaha.
Ia training program-ko matchotatani somoio West Garo Hills a·jani District Horticulture Officer Thera Ch Marak, mongsonggipa sokgipa ong·e jinmana aganprakangengon, ia jolrango game ge·e cha·enggipa manderangna bang·en dakchakanirangko on·engani gimin ia college-ni Dean Dr Jyoti V Vastrad aro college gimikkon mittelpilangaha.
Ia training-o skie ra·gipa changa sapanirangko jakkale an·tangtangna bading chiwalanirangko a·bachengatchina aro an·tangtangni janggi tangani gadangko namdapatchina gita training-o skie ra·gipa manderangkoba didiangaha.
