U·IATTIMGIPAONI
SHILLONG: Meghalaya a·doko bang·bata deficit college-rangan August 1 tarik dipet National Education Policy (NEP) 2020-ko ra·gatahaoba Shillong songjinmani St Anthony’s College, August 16 tarik dipet NEP-ko a·bachengatskaaha.
St Anthony’s College-ni principal Br. Albert Longley Dkhar-ni parakatani gitade, a·dokni bang·bata deficit college-rangan NEP-ko August 1 tarikonin a·bachengatahaoba dingtang dingtang neng·nikanirang dongkuengani gimin sengkuna tik ka·ahachim indiba college-o poraienggipa chatro chatrirangni ma·a paarang aro gipinrangni didianiko man·ahani gimin ia college-ba August 16 tarik dipet NEP-ko a·bachengataha.
St Anthony’s College-ba August 1 tarikonin NEP-ko a·bachengatani ong·achim ine janapatengon, NEP-ko a·bachengatanio dingtang dingtang neng·nikanirang dongkuenga ine college-ko chalaigiparang nikahani gimin uamang August 1 tarikonide a·bachenggija somoiko sengkuna tik ka·ahachim ine Br. Dkhar parakataha.
“Chingaba NEHU-o bak ong·paenggipa college ong·ani gimin aro university-onin NEP-ko a·bachengatchina college-rangna ge·etaniko on·manahani gimin chingaba NEP-ko a·bachengatna nangaon ga·akaiaha. Indake ong·genchimoba, July 12 tariko on·atgipa notification-de university-ni niamo pangchake asol office-oni ong·kuja ine chinga ma·sienga,” ine Br. Albert aganaha.
First semester-ni chatro chatrirangna orientation program-rangko ong·atchengani ja·mansa NEP-ko a·bachengna tik ka·aha ineba St Anthony’s College-ni principal talataniko on·angaha.
Indake ong·engon, first semester-ni chatro chatrirangko class ra·anio college-ni management, Meghalaya College Teachers Association (MCTA)-ni skigiparangosa pangchakna nangaigen ineba college-ni principal parakataha.
“Deficit system-ba ching sak 100 batpile skigiparang donga indiba MCTA-ni skigiparangko gital syllabus gitasa first semester-na class-rangko ra·china association-ni central body ge·etaniko on·manahani gimin skigiparangba central body-ni ge·etani gita dakna nangenga aro ianosa chinga neng·nikanikode man·enga,” ine Br Albert aganaha.
MCTA-ni skigiparang, an·tangtangna training-rangko ra·na gita somoirangko nangdapkuengani giminsa NEP-ko jegalengachim ineba ua parakataha.
Br Albert-ni parakatani gitade, da·o dipet uamang first aro second semester-ni syllabus-kosan man·sokuenga indiba gimik semester-ni syllabus-rangkode man·sokujaenga.
“Anga University-na phone ka·engachim indiba uamang ra·chakkujaenga. Da·alona kingkingan chinga ia college-ni Bachelor of Music course-naba syllabus-ko man·kujaenga,” ine St Anthony’s College-ni principal parakataha.
