U·IATTIMGIPAONI
TURA: Garo Hills-o Mid-Level Health Provider (MLHP)-ni kamna A·chik candidate-rangko nichanggala ine dingtang dingtang dolrang matnangatani ja·man da·o Tura-o MLHP-ni kamna komibeoba sak 21 candidate-rangko ra·na gita Meghalaya a·dokni National Health Mission (NHM), gital dake advertisement ba u·iataniko on·taiaha.
NHM-ni gital advertisement-o u·iatani gitade, ia kamna walk-in interview-ko re·baenggipa September jani 4 tarik pring 10:00 bajioni, Tura-ni Working Women’s Hostel-o ong·atanggen aro ia interview-o seokako man·gipa candidate-rang, a·dokni dingtang dingtang Health & Wellness Centre-rango kamko ka·na donatako man·gen.
Ia interview-o gimik sak 21 MLHP-rangko ra·gen ine u·iatengon, seokako man·gipa candidate-rangna tik ka·gimin dormaharang baksana uamangni kamni kri gipin man·gnirangba donggen ine NHM parakataha.
Iana skang, Garo Hills-o MLHP-ni kamna ra·anio Garo Hills-oni saksaba biapko man·riktokjahachim aro kamna seokako man·gipa candidate-rang gimikan Woodland Hospital Nursing Institute aro NEIGRIHMS-onisa ong·tokachim.
Garo Hills-o B.Sc Nursing aro GNM-ko recognize ong·gipa institute-rangoni pass ka·gipa candidate-rang dongjani a·selsa gipin biaprangoni candidate-rangko kamo ra·skana nangaha ine sorkarini talatanikoba dingtang dingtang dolrang raken jegalatenba, MLHP-ni kamna A·chikrangoniba B.Sc Nursing aro GNM graduate-rang bang·en donga ine talataniko on·angtokahachim.
