U·IATTIMGIPAONI
SHILLONG: Meghalaya a·doko National Education Policy (NEP) 2020-ko ra·gatanikode jegalenga ong·ja indiba NEP-ko ra·gatna sikkelengani giminsa jegalenga ine Sombar salo, Meghalaya College Teachers Association (MCTA) talataniko on·angaha.
Iani bidingo kobor ra·timgiparangna talataniko on·angengon, college-rango NEP-ko ra·gatna gita da·o dipet taria chu·ongkujani gimin college-rango NEP-ko ra·gatchina ge·etaniko NEHU-ni Vice Chancellor ra·pilna nanga ine MCTA-ni dilgipa David F Marbaniang parakataha.
Marbaniang-ni parakatani gitade, NEP 2020-ni ning·o da·o ong·enggipa bilsi gittamni undergraduate course-ko bilsibri dakatgnok aro semester-rangba mingdokoni mingchet ong·anggnokchim.
“Da·o dipet chingo skanggipa semester ge·gninasan syllabus-rang donga indide uni ja·man semester-rangnara mai dakatenga? Gital niamko ra·gatengon aro curriculum-ko a·bachengatengon, chu·onga gita kamrang matchotchengesa ra·gatna nanga,” ine MCTA-ni dilgipa aganaha.
NEHU-o Business Administration aro Music Department-rangna syllabus-rang dongkuja ine janapatengon, da·o Business Administration department-nade syllabus-ko NEHU academic council-ni ra·chakchengani gri tariskaaha ine Marbaniang parakataha.
Syllabus-rangan chu·ongkujaenga ong·ode maikai NEP 2020-ko ra·gatna am·enga ineba ua sing·doataha.
Marbaniang-ni parakatani gitade, chatro chatrirang college-rango admission-ko ra·engon, re·anggipa May ba June jarangosa gitcham curriculum-o aro college-ni on·gipa prospectus gitasa admission-ko ra·tokahachim aro gittamgipaoni chetgipa semester-rangonade mai dakgipa paper-rangkon ra·na sienga darangba ma·sitokkujaengachim.
Gital NEP-ni ning·ode chatro chatrirang, semester ge·praknan gong 4210-na baten fee-rangko gamdapna nanga ineba MCTA-ni dilgipa parakataha.
“An·chingni bang·bata chatro chatrirangan indita fee-rangkode gamsokpajawa indide sawa uamangna fee-rangko gamchakgen?” ine Marbaniang sing·doataha.
Indake ong·engon, Tamil Nadu, Kerala, Maharashtra, West Bengal aro Karnataka gita dakgipa a·dokrangde re·baenggipa bilsioni NEP-ko ra·galpilna tik ka·aha ine MCTA-ni sakgipin membor parakatskaaha.
“UGC website-o pangchake an·ching university-rangko niatgenchimode gimik dam 56 central university-rangoni dam 19-san NEP-ko ra·gatangna tik ka·aha,” ine MCTA-ni dilgipa parakataha.
