U·IATTIMGIPAONI
SHILLONG: Walo bijoli siatna tik ka·gipani bidingo MeECL, warachake aganaha.
Chirang da·o chu·onga gita dongahao mangba Shillong-o walantian konta gnide bijoliko siatenga ine nikna man·enga.
Ia konta gni siatgipasan load shedding ka·gipade ong·aia, gipin somoirango bijoli sigiparangde gittimrango mainiba a·selna siatasan ong·aigen ine MeECL MD Sanjay Goyal aganaha.
“Da·o dipeto a·doko 210 MW mang bijoliko bikotenga, jeon central Genco-niko man·gipa baksade gimikchi 430 MW bijoliko man·enga, Goyal aganaha.
A·doko bijoli man·enggipa gimikoniko, re·anggipa sin·kario jakkalgimin bijoliko MeECL, da·oba 190 MW-kode walpilna nangenga, jean bijoli man·a gimikoni 45% ong·nasia, Goyal aganaha.
“Iani a·sel on·timintide walo bijoliko siatna nangao ga·akenga. Aro manderangna neng·nikbataniko chel·atna gitasa walo konta gnina bijoliko kimitenga,” Goyal agandapaha.
