U·IATTIMGIPAONI
TURA: National Health Mission (NHM)-ni ning·o sak 41 candidate-rangko Mid-Level Health Provider (MLHP)-ni kamna seokanio sorkarini dongimin niamrangko pe·aha ine matnangenba, ia kamo ra·gimin candidate-rangko ra·galpilchina Tura-ni Senior Citizens Forum, Garo Graduates Union, New Tura Development Forum (NTDF) aro uandakgipa dingtang dingtang dolrang dabiangaha.
Iani bidingo a·dokni Chief Minister-na sedoatengon, MLHP-ni kamna seokanio Garo Hills-ni candidate-rangnade advertisement on·aba dongja aro interview-rangko ra·chenggijasa ia sak 41 candidate-rangko MLHP-ni kamo ra·aha ine NGO-rang matnangataha.
MLHP-ni kamna seokako man·gipa candidate-rangara jatsaonisan ong·aia aro ian a·doko songdongenggipa gipin jatrangnade ra·chakna man·gijani ong·a ineba ia dolrang parakataha.
Ia candidate-rangko Garo Hills-nasa ra·ahaoba candidate-rang gimikan gipin jatrangsa ong·ani gimin kamrangko ka·anio bang·en neng·nikanirangko man·gen ineba NGO-rang parakataha.
Kamrang regular ba contractual ong·genchimoba pilak jatrangnan apsan ong·e sualna nanga ine janapatengon, kamna ra·anio sorkarini dongimin niamrangko NHM pe·aha ine Garo Hills-ni NGO-rang matnangataha.
A·chik candidate-rangoni saksaba ia kamna qualify ong·jachim ine Chief Minister Conrad K Sangma-ni talatgipa kattarangkoba ia dolrang raken jegalataha aro Chief Minister-ni iandakgipa kattarangko agananiara namen kragijani ong·aha ine parakataha.
Iandake kamo ra·aniko Garo Hills-ni manderang maming dakeba ra·chakna man·jawa ine janapatengon, kamo ra·gimin candidate-rangko ra·galpilchina aro kam on·anio jak donggipa official-rangni kosako rakgipa ja·kurangko de·china NGO-rang didiataha.
