NEHU-o grading system-ko dingtangatchina NEHUSU dabia

U·IATTIMGIPAONI

SHILLONG: North Eastern Hill University (NEHU)-ni da·o jakkalenggipa grading system-o chatro chatrirangna mark-rangko on·chepengani a·sel, chubata gadangrango poraiangna aro dingtang dingtang kamrangna susaanio chatro chatrirang neng·nikanirangko chagrongna nangtokenga ine North Eastern Hill University Students Union (NEHUSU) matnangenba, iani bidingo jingjengatanirangko dake, da·o jakkalenggipa grading system-ko dingtangatchina dabiangtokaha.

NEHUSU-ni parakatani gitade, NEHU-o iandakgipa grading system-ko jakkale, chatro chatrirangna mark-rangko on·chepengani a·selan poraiani aro kamrangna susaanirangoba chatro chatrirang neng·nikanirangko chagrongna nangtokengachim.

Iani bidingo NEHU-ni Vice Chancellor Prof PS Shukla-na sedoatengon, NEHU-ni grading system-ko dingtangatchina aro university-o poraienggipa chatro chatrirang, dingtang dingtang kamrangna susaanio maming neng·nikanirangko chagrongna nangjana gita chatro chatrirangna mark-rangko nambate on·china NEHUSU didiataha.

“NEHU-o poraienggipa chatro chatrirangni namgnina ta·raken grading system-ko dingtangatna nangchongmota. Chatro chatrirangna nambata grading system-ko ra·gatkujaskal 2^nd semester result-rangkoba parakgija donkuchina chinga dabienga,” ine NEHU-ni Vice Chancellor-na sedoatgipa chittio NEHUSU parakataha.

Gital grading system-o nangchakena gita da·o ong·enggipa batch-ni gitcham semester result-rangko nipiltaichina gitaba NEHUSU dabiangaha.