U·IATTIMGIPAONI
Nongpoh: Pekgipa samrangko badingsrukni bidingo dal·begipa bosturangko am·sandianio Butbar walo Byrnihat Police Outpost pekgipa samrangko mande saksaoniko man·aha, rim·a man·gipa pekgipa samrang tangka kror 1.3-ni gita ong·gen ine u·iataha.
Jensalo Byrnihat Police Outpost phone gita koborko man·soenba Butbar walni 9:51 bajio am·sandianiko a·bachengataha, jeon Rahul minggipa mande Guwahati-oni Shihllong-ona bang·a pekgipa samrangko ra·baengachim. Ta·rake koborrangko man·soe Byrnihat Police Outpost-oni police officer-rang aro sipairang ta·rake National Hihgway-6 baksa Naka Checking-ko a·bachengataha.
Wal 11:30 bajio chanchichipgipa mande Rahul Nazary-ko uamangni am·sandimiting somoio rim·aha. Ua tourist gari sallgipa ML 05 T 6149 gari numbor register ka·gipao gadobaaha. Shillong-ona ma·sian baksa heroin-ni ge-10 box-rangko sokate on·a ra·baenga ine sing·sandiani somoio Rahul ku·rachakangaha.
Niamni gita kamrangko nikjoke ka·angna man·a, am·sandianiko gazetted officer aro sakkina sakgipin manderangni dongpanio am·sandiangaha. Rahul-ni sling bag chongipaoniko chanchichipgipa heroin-ko ge-10 sabon box-rangoniko man·aha.
Rahul Nazary, Kamal Nazary-ni depante ong·a aro uamang East Khasi Hills a·jani Madanriting Police Station-ni ning·o ga·akgipa Happy Valley-o dongkamgipa ong·a, niamko jarikangani bako midecal porikka ra·e niaha aro ja·mano minggipin dakna nanggnirangko dakangna lockup-o donangaha.
Pekgipa samrangko man·ani ja·man toe nianio gram 135.64-ni gita jreaniko ma·siaha aro iani dam tangka kror 1.3-ni gita ong·gen aro ian pekgipa samrangko badingsrukani kosako dakgrikanganio dal·begipa cheanirangko man·enga ine parakataha.
Ri-Bhoi Police-ni pekgipa sam badingsrukgipako a·doko rim·anina aro gamchatgipa narcotic-ko man·a chu·sokanio Ri-Bhoi police-ni jotton ka·anina da·alo Meghala-ni Director General of Police Dr. LR Bishnoi de·mittele aganataha.
“Narcotic-ni bang·a minggipin bosturangko man·aha, a·dokona mande saksa tangka kror 1.3-ni gita ong·gipa pekgipa drugs samrangko badingsrukna jotton ka·baako Ri-Bhoi police am·sandie rim·aha. Indakgiparangko badingsrukgiparangni network-ko bon·atna chinga Meghalay Police chu·gimik on·kange kamrangko ka·angkuenga, team-na nama skaniko on·ata, ine uni tweet-o Dr. Bishnoi operation-ni chu·sokanina seataha.
