U·IATTIMGIPAONI
SHILLONG: Mikbokanian gape, uni party ge·sa ge·gipinona katjengjenganide bon·chipjawa ine aganan baksa Party-ko matnangenba watangani gimin State BJP Mahila Morcha, Sukrobar salo BJP-ni gitcham dilgipa HM Shangpliang-ni kosako matnange aganaha.
“Shangpliang-ni “mikka nitee kam ka·a ine agangipa katta kakket ong·ja. Ian, party-ko watangna chol am·enba gipinko dosi gale, State president-ko mandera·gija Shangpliang-ni chanchianisan ong·aia” ine BJP Mahila Morcha-ni State president, Susuki Pariat aganaha.
“Unaskang gipin dolgni Political Party-rangko watbaani somoioba ua ia apsan kattakon matnange aganaha, an·tangni political-ni namgnina uni ja·kol sananide bon·changjawa,” ua agandapaha.
Ua indakeba talataha je, BJP State Mahila Morcha President-ko, State president Ernest Mawrie seokaha aro State Mahila Marcha Executive Committee-koara, bil on·anio pangchake office bearer-rang baksa agangrikenba Party Constitution gita ua songskaaha, Shangpliang-ni matnange agana gita President Ernest Marie-de songja.
BJP State Malla Morcha President, agandapku je Mahila Morcha-ni sakgittam General Secretary-rangko, dongimin niamrango pangchakesa seokaha.
Mikkang nitee kam ka·a ine Shangpliang-ni matnanganide maming ja·pang ja·dilgri aro simsakgija aganbinganisan ong·aia ineba ua aganchakataha.
“Shangpliang-ni cha·pile matnange agana gita ong·srangja, State Mahila Morcha Executive Committee gimikan, uamangko State President Ernest Mawrie seokja ine sakkiko on·tokna man·gen,” ua agandapaha.
“BJPD-de gadangna rikgipa party ong·ja, indiba a·dokni namroro-silrorognina aro tom·tomanina kam ka·gipasa” ine Susuki Pariat aganaha.
