U·IATTIMGIPAONI
AMPATI: Mongolbar salo, South West Garo Hills a·jani District Mental Health Program-ni gita World Suicide Prevention Day-ko Ampati-ni Multi Facility Centre-o manidilangaha aro ia program-ko ong·atanio South West Garo Hills a·jani Superintendent of Police (SP) Vikas Kumar, SWGH a·jani Medical Superintendent Dr Denisha Momin, Child Development Project Officer Torali Marak, District Mental Health Program-ni District Nodal Officer Dr Matgrik K Sangma, dingtang dingtang skulrango poraienggipa chatro chatrirang aro skigiparangba dongpae bak ra·angtokaha.
Suicide Prevention Week-ko maniani bak gita iana skangba, Bike Rally, Slogan Writing Competition aro cricket kal·susaanikoba ong·atangahachim. Slogan Writing sesusaanio chegiparangna aro Tura-ni A·kawe Motorcycle Club-na dingtangmancha ia salko manianio mande ra·pilskaaniko dakangjolaha.
Ia tom·anio South West Garo Hills a·jani SP Vikas Kumar, mongsonggipa sokgipa ong·e, jinmana aganprakangengon, mande sakantini janggikon gamchate ra·na nangani gimin aganangenba, maiba neng·nikanirangko chagrongna nangon pangnan an·tangni nokdangni manderang baksa agangrikrongchina gita mande sakantikon didiangaha.
Ia program-ko ong·atahani gimin District Mental Health Program-ko mittelpilangengon, gisikni gita neng·nikanirangko pangnan Jinmao agangrikna kratchajachina aro nangan somoirango pangnan doctor-rangni dakchakanirangkoba ra·china gita SP didiangaha.
Ia tom·anio SWGH a·jani Medical Superintendent Dr Denisha Momin-ba jinmana aganprakangengon, ia sal somoirango manderangni so·ote sianirang batroroengani gimin iandakgipa a·selrangko champengna gita manderangna mikrakatanirangko on·na nangengani gimin aganangaha.
