U·IATTIMGIPAONI
TURA: South Garo Hills a·jani Chokpot Civil Sub-Division-ni ning·o donggipa dingtang dingtang rama jal·langrang namsrangjaengahani a·sel ramako re·ruraenggipa manderang aro jolni manderang neng·nikanirangko chagrongna nangtokenga ine Association for Democracy & Empowerment (ADE) Gasuapara regional unit parakatenba, ia ramarangko re·ruraenggipa aro jolo songdongenggipa manderangni namgnina ia rama jal·langrangko ta·raken taripile on·china gita a·dok sorkariko didiataha.
ADE Gasuapara unit-ni president Callyneccan Ch Sangma-ni parakatani gitade, Chokpot-oni Sibbari, Chokpot-oni Kakija aro Asakgre songrangona dakanggipa ramarangko bilsi 10-na skangan tarina gita a·bachengahachim indiba ia ramako taria matchotgimin bakrangba adita bilsirangni gisepon nosto ong·piltaiaha aro mitam bakrangkode da·onan matchotchipskakujaengachim.
“Ia ramarangko tarina a·bachengatahaoba department-ni official-rang simsak nirokanirang dongjahani a·selan contractor-rang skatang kamrangko ka·e matchotatna jotton ka·aha aro iani a·selan ramarang bakan nosto ong·piltokaha. Uni gimin kamrangko gital dake a·bachengpiltaina gita tender-ko on·piltaichina aro je contractor-rangan skatang dake kamrangko ka·achim, uandakgipa contractor-rangnade kamrangko on·jachina chinga dabienga,” ine Sangma parakataha.
Indake ong·engon, kamrangko name nirokjringchina aro nangani kri department-ni official-rangna ge·etanirangko on·china gita ADE Gasuapara unit, Chokpot-ni MLA Sengchim Sangma-koba didiataha.
Photo: South Garo Hills a·jao ramarang namjae bus gari bolsako manderangni sikduengmitingko noksao nikna man·enga. Noksa: ADE Gasuapara unit.
