U·IATTIMGIPAONI
SHILLONG: Re·anggipa July jao Tura-ni Mini Secretariat-o Chief Minister-ni dingtang dingtang dolrang baksa tom·e agangrikengmiting somoio rang·gitik so·sojengjeng ong·atanio jak donggipa manderangko, bobil dolni manderang gita Unlawful Activities Prevention Act (UAPA)-ni ning·o rim·ahani gimin Sukrobar salo, Meghalaya a·dokni Trinamool Congress (TMC), a·dok sorkarikni kamko jegalataha.
“Tura-o so·sojengjeng ong·anina anga an·tangba namen suk ong·jaha aro ia obosta ong·ani ja·man sorkari aro police-rangni kamko nigenchimode ia pilakan uamangni chanchisamsoe dakani gitasa nikna man·gen,” ine TMC parliamentary party-ni dilgipa Mukul Sangma aganaha.
Sal napangani ja·mansa ro·ongrangko gona a·bachengahachim ine janapatengon, “Ia a·selna rim·ako man·gipa manderangara bobil dolni manderang gitasa sorkari, uamangko Unlawful Activitied Prevention Act gita dakgipa niamrango pangchake rim·aha aro ian sorkarini namen ra·chakna man·gijagipa kam ong·aha,” ine Sangma parakataha.
“Ua somoio bak ra·pagipa manderangara bobil dake chakatgiparangsachimma? Ua somoio bang·a manderangan sorkari baksa agangrikani biteko knatime ra·panasa re·angahachim indiba ua somoio dongpagipa chatro chatrirangkon bobil dolni manderang gitasa UAPA gita dakgipa niamni ning·o rim·skaaha,” ine Sangma aganaha.
Ua somoio rim·ako man·gipa chadamberangara bilsi 19-20-mangsan ong·kuenggipa chadamberang ong·e poraienggiparangsa ong·achim ine janapatengon, poraienggipa chatro chatrirangko bobil dolni manderang gita UAPA-ni ning·o rim·aniara kraani ong·ama ine Sangma sing·doataha.
“Badiaba dolko bobil dol ine parakna skangba MHA-ni ja·rikna nanggipa niamrang donga indiba ia chadamberangko a·dok sorkari, skatang bobil dolrangni kosako on·gipa niamrango pangchakesa rim·skaaha,” ine TMC-ni dilgipa aganaha.
Mikkangchi iandake gualanirangko daktaijachina gitaba Sangma, a·dok sorkariko mikrakataha.
