U·IATTIMGIPAONI
SHILLONG: Mawmluh Cherra Cements Employees Union (MCCEU), uamangni kam ka·chakgipa Mawmluh Cherra Cement Ltd plant-o chagronggipa neng·nikarangko janape, Chief Minister-na chittiko seataha. Kam ka·giparangna on·kugijagipa tangkako on·china chittio janapataha.
MCCL, gitchambatgipa public sector undertaking unit ong·a, jekon bilsi 1960-oni a·bachengataha. Indiba batanggimin adita bilsirangonin ia company, gimaanio ong·enga.
Uandake ia company-ko tangchaatpilatna gita MCCEU, company-o gital gital equipment ba technology-rangko donchina gita sorkario mol·molataha.
Union, kam ka·giparangna Golden Handshake scheme-koba ra·gatchina mol·molataha. Ia scheme-ara employee ba kam ka·giparangna dingtang dingtang neng·nikan somoirango grant ba tangka paisako on·ani bidingo ong·a.
Uandake privatization-ni ba private dakatani gimin sing·on, president Shanlong Diengdoh indine aganchakaha, “Chingni man·a nanggnirangko somoi gita on·genchimode aro kam ka·giparang maming neng·nika gri janggi tangna cholko man·ode, chinga maming dakeba neng·ja.
Plant-o sak 400 permanet worker ba kam ka·giparang donga ine Diengdoh aganaha.
