U·IATTIMGIPAONI
SHILLONG: Meghalaya a·doko cancer sabisiko sanna banani cholrang dongjae, cancer man·gipa manderang aro uamangni nokdangrang neng·nikanirangko chagrongna nangtokengon, Shillong Civil Hospital-ni cancer wing-o sanna bananirangko ra·enggipa manderang, private clinic-rangonikosa chemo injection-rangko dam rakbee brena nangtokengani a·sel neng·nikanirangko chagrongna nangtokenga ine kobor on·aha.
Iani a·selan cancer saaniko man·gipa manderang, mongsongbate kangal cholgrirangde sanna bananirangko ra·na cholrang ong·pajaengaha ine kobor on·timgiparang parakataha.
Michael Kharsyntiew minggipa mande saksani kobor ra·timgiparangna parakatani gitade, Mawprem-oni cancer man·gipa mande saksa, jean kangal cholgriba ong·paachim, private clinic-onikosa chemo injection-rangko brena draatako man·ahachim.
Ia chemo injection-rangni damara gong 10,000 batpilachim aro kangal cholgrirangde indita damni bosturangko brena chol ong·pajaenga ine Kharsyntiew parakataha.
Iani bidingo MHIS counter-rango sing·sandion, baditaba antirangna bosturang sokbajae da·o chemo injection-rangko man·jaenga inesa una aganchakaiahachim.
Kangal cholgrirangoniko iandake tangka paisarang oke ra·ani ja·manba mitamkode sansretanirang aro miram sagiparangkode dake nianirangkoba knana man·kuenga ineba ua suk ong·gijaniko parakataha.
Iani bidingo toe janapatengon, adita salrangna skangsan sorkari hospital damsao, baditaba antirangna sanna bananiko on·ani ja·man, saenggipa kangal mande saksako janggi tangna ka·dongani dongjaha inesa doctor-rang aganataiaha ine Kharsyntiew parakataha.
Ja·mano ‘Samariani namgipa mande’ saksani dakchakanichisa ia mandeko Guwahati songjinmani Apollo Hospital-ona ra·jitangna man·aha aro uko joljolan surgery dakaha ineba Kharsyntiew parakataha.
“Da·o uko sannani ja·man antisani gisepon ua an·sengbapilengaha,” ine ua aganaha.
Iandakgipa matnanganirangni gimin a·dokni Health Minister Ampareen Lyngdoh-o sing·sandiaton, ua iani bidingo am·sandiatgen ine parakatskaaha.
