U·IATTIMGIPAONI
RESUBELPARA: Contractor-na department-ni gamna nangenggipa tangka paisarangko gamna man·na gita uoniko ku·mitdu on·china dabiaha ine Bajengdoba-ni SDO KG Momin-ni kosako West Garo Hills a·jaoni contractor saksa Tarseng Sangma, badi ka·doangaha.
Iana skangba ia contractor, SDO-ni kosako Bajengdoba police station-o FIR ka·doangahachim aro da·o ua iani bidingo Meghalaya High Court-o badi ka·doangskaaha.
Indake ong·engon, ia SDO, re·anggipa September-ni 12 tariko an·tangni ukilchi affidavit-ko tarina gita antigni somoiko bi·dapskaaha.
Koborko on·ani gitade, ia contractor-ni ka·gipa kamara Jal Jeevan Mission (JJM)-ni kam ong·achim aro uni North Garo Hills a·jani Bajengdoba jolo donggipa Akemgre songo ka·gipa kamni bill-ara gong 74,64,200 ong·ahachim.
Ia work order-ko una 2022 bilsini March 10 tariko on·ahachim.
Ia contractor-ni kobor ra·timgiparangna parakatani gitade, ua Akemgre songo JJM-ni kamko matchote PHE department-na completion report-koba on·manahachim. Uni completion report-ko on·ani ja·man third party agency-ni gitaba, ia 2023 bilsini May 5 tarikon uni kamrangko nienba, kamrang matchotaha ine parakatahachim.
Ia kamrangko matchotani ja·man ia contractor, an·tangni bill-na SDO-ko gronge agangrikeon, uni man·na nangenggipa tangka paisarangko on·na gita uoniko gong lak 1-na baten ku·mitduko on·china SDO dabiskaaha ine ia contractor parakataha.
“Angni bill-ko gamna gita nangenggipa korosrangna ine ua angoniko tangkarangko bi·aha. Angaba tangka paisani gita neng·nikanirangko chagrongna nangengani gimin una gong 30,000-kode on·na ku·rachakaha aro unon ua gong 30,000-koba ra·chakna kusi ong·e salgni salgittamni gisepon angni bill-ko gamatgnok ine aganataha. Anga August-ni 10 tarikon uni account-ona Google Pay gita tangkarangko chipatahachim indiba da·alonan angni bill-ko ua gamskakujaenga,” ine Tarseng Sangma, High Court-na badi ka·gipao parakataha.
