U·IATTIMGIPAONI
SHILLONG: Meghalaya a·doko dilgiparangni tangka paisarangko ong·gija dake jakkalsretanian bobil dake chakatgipa dolrangko ong·katattaigen ine a·dokni gitcham chief minister aro Trinamool Congress (TMC)-ni dilgipa Mukul Sangma parakataha.
Meghalaya a·doko bobil dake chakatgipa dolrangko bikottaina jotton ka·enga ine koborrangko man·soahani gimin Mukul Sangma, ia kattarangko aganaha.
Adita salrangna skangsan, Khasi aro Jaintia Hills a·jarangoba National Liberation Council of Nongkyndong (NLCN) minggipa bobil dolni manderangko police-rang rim·na man·ahachim ine nikna man·a.
“A·doko kamrangko ka·e cha·na cholrangko man·jahaon ba da·o gita bilo ong·enggipa manderangni, tangka paisarangko ong·gija dake jakkalsretahaon an·ching iandakgipa kamrangko nikna man·ronga. Dilgiparangni kamrangchin a·doko bobil dake chakatgipa dolrang ong·kattaiani cholrang donga,” ine Sangma parakataha.
Bobil dake chakatgipa dolrang ong·kattaiahaon iandakgipa kamrangko namatpilna neng·beani kam ong·gnok ineba Sangma, suk ong·gijaniko parakataha.
“Ian a·doko ong·na sienganiko ka·sinsin mesoksoanisa ong·enga aro ia ong·bebeahaode bilsi 15-20-mangnade apsan daken dongaignok. Ia bilsi 15-20-ni gisepo neng·nikanirangko sawa namatgen?” ine TMC-ni dilgipa sing·doataha.
