U·IATTIMGIPAONI
RESUBELPARA: North Garo Hills a·jani Dainadubi jolrango mobile network-rangko name man·jaengani a·sel jolo songdongenggipa manderang neng·nikanirangko chagrongna nangtokenga ine Dainadubi Circle Youth Organisation (DCYO) parakatenba, ia jolrango mobile network-ko nambate on·china aro kamrangko nirokatchina North Garo Hills a·jani Deputy Commissioner-na sedoataha.
Iani bidingo North Garo Hills a·jani Deputy Commissioner-na badi ka·e sedoatengon, Dainadubi-ni samba jolrango, JIO, BSNL, Airtel aro uandakgipa mobile company-rangni tower-rang donggenchimoba, ia tower-rangni bil chu·ongjaengani a·sel network-ko name man·tokjaenga ine DCYO-ni president Gilsang D Shira parakataha.
“Ia biaprango mobile tower-rangko songkujamiting somoirangon Daibadubi jolrango Assam-ni mobile network-rangko nambate man·pilachim indiba ia jolrango mobile tower-rangko songani ja·man batesa chinga mobile network-rangko man·srangjaengaha. Uni gimin jolo songdongenggipa manderangni namgnina ta·raken ia kamko nirokatchina chinga mol·molenga,” ine North Garo Hills a·jani DC-na sedoatgipa chittio Shira parakataha.
